بكلمات مؤثرة وتعترف بمجهود الفنان استطاع الممثل رشيد الوالي بأن يذكر الجمهور المغربي بالفنان المقتدر عبد الرحيم التونسي والمشهور باسم عبد الرؤوف٠
واتخذ رشيد صفحته الرسمية عبر الأنستغرام للقيام بهده العملية، حيث نشر صورة عبد الرؤوف وأرفقها بتدوينة قال من خلالها: “لا مماتش الله يطول عمرو ويعافيه ياربي .٠هو عبد الرؤوف وهاذ الجيل مكيعرفوش إلا لقليل فيهم . عادي كل زمان وناسو ..وحتى حنا غادي يجي وقت وميعرفوناش الشباب الطالعين ..ولكن هذا ميمنعش باش نقول كلمة على هاد الكوميدي اللي ضحكنا وضحك كل مغربي كيف ما كان المستوى ديالو …خلق البسمة بلا ميخدش الحياء ولا يضحك من عاهة ولا إعاقة ديال الشخصيات …كان فوقت كانت عندنا قناة وحدة ..باقي كنعقل فنهاية السبعينات كتطلب منا الوايدة نجيبو الطحين من الحانوتي واللي كان قليل ومول الحانوتي كيرفض يعطيك أكثر من كيلو او زوج كيلو للفرد .كنا كتار وكان لازم اننا نتناوبو باش نشريو الطحين كلنا باش ناخدو الطحين اللي يكفينا ..يمكن هاد الشي نسيناه مع الوقت .والحمد لله كلشي متوفر ليوم خاص غير لفلوس ….المهم أنني كنت كنتصارع أنا وخواتي على شكون اللي غادي يمشي يجيب الطحين لأن السكيتش ديال عبد الرؤوف غادي يدوز فالتلفزة . ولا مشفتيهش صافي هزك الما لأن التسجيلات والفيديو مازال منتاشرش. ..كانت الزنقة كتخوى من الناس والدراري كيدخلو لديورهم …وقليل اللي كان عندو التلفزيون فالدار ..عليها كانو بزاف ديال الدراري كيجيو لدارنا. وامي كتدير الرغايف بالطحين اللي عاد شريناه للخبز .٠٠ايام فيها الفقر والشجاعه..ولكن فيها بزاف ديال الحب والبساطة”٠
وأضاف في نفس السياق: ” ليوم وأنا كنكتب لعبد الرحيم التونسي وهو عبد الرؤوف كنبغي كنبعت ليه بزااف ديال الحب والتقدير والاعتراف. عاش نجم وخدمو معاه بزاف ديال الكوميديين .واللي تشهرو حتى هوما ٠٠شكرااا سيدي عبد الرحيم على البسمة اللي كنتي قادر تخلقها فوجوهنا .والله يعطيك الصحة ويخلي ليك ولادك اللي كيرعاوك بكل حب . نحبك .٠وانتوما يمكن يقرا لعبد الرؤوف شي واحد من ولادو هاد السطور حيت مبقاش يشوف …خليو ليه كلمات عبرو فيها على احساسكم وحبكم ليه .غادي تكون أحسن وأجمل إعتراف .ولكم الأجر . شكرااا ليكم”٠
